புது டெல்லி :
பீகார் முதல்வர் நிதீஷ்குமார் கடந்த ஆண்டு பாஜவுடன் இணைந்து புதிய ஆட்சி அமைத்தார். இதற்கு ஐக்கிய ஜனதா தள கட்சியின் மூத்த தலைவர் சரத் யாதவ் எதிர்ப்பு தெரிவித்தார்.
இதைத்தொடர்ந்து, ஐக்கிய ஜனதா தளத்தின் முன்னாள் தலைவர் சரத்யாதவை மாநிலங்களவை எம்.பி. பதவியில் இருந்து தகுதி நீக்கம் செய்து கடந்த டிசம்பர் மாதம், அக்கட்சியின் மாநிலங்களவைத் தலைவர் ராம்சந்திர பிரசாத் சிங் உத்தரவிட்டார். இதற்கு தடை விதிக்கக்கோரி சரத்யாதவ் டெல்லி உயர்நீதிமன்றத்தில் வழக்கு தொடர்ந்தார்.
இந்த வழக்கை விசாரித்த டெல்லி உயர் நீதிமன்றம் இடைக்கால தடை உத்தரவு எதையும் பிறப்பிக்கவில்லை. அதே நேரம், எம்.பி. என்கிற முறையில் சரத்யாதவ் அரசு ஊதியத்தையும், சலுகைகளையும் பெற்றுக் கொள்ளலாம் எனவும், தனக்கு ஒதுக்கப்பட்ட அரசு பங்களாவில் அவர் தொடர்ந்து வசிக்கலாம் என்றும் உத்தரவு பிறப்பித்தது.
ஆனால், இதை எதிர்த்து ஐக்கிய ஜனதாதளத்தின் தலைவர் சந்திரா, சரத் யாதவ் அரசு பங்களாவை காலி செய்யக் கோரி உச்ச நீதிமன்றத்தில் மேல்முறையீடு செய்தார். இன்று விசாரணைக்கு வந்த இந்த வழக்கில் டெல்லி உயர் நீதிமன்றம் அளித்த தீர்ப்பை சற்று மாற்றி அமைத்து தீர்ப்பளித்துள்ளது.
அதன் அடிப்படையில், சரத் யாதவிற்கு அரசு ஊதியம், ரயில் மற்றும் விமான சேவைகளில் வழங்கப்படும் சலுகைகளை நீக்கி உத்தரவிட்டுள்ளது. அதே சமயம், இம்மாதம் 12-ம் தேதி வரை அவர் அரசு பங்களாவில் வசிப்பதற்கு தடை ஏதும் இல்லை எனவும் நீதிமன்ற உத்தரவில் குறிப்பிடப்பட்டுள்ளது. #SharadYadav
